Ce sta ‘n ombrell’o ssai, ninnillo mio
Ca t’accumpagn’a quanno tu sì nato.
Ti segue ovunque e quant’è over’ Iddio,
d’ o primmo juorno nun t’ha mai lassato.

Tene ‘na fibra forte e resistente
E nu tessuto ca fa respira’!
Pure si nunn o vviri iss’è presente
E nun si stanca mai e ti ripara’!

Quanno d’o cielo chiov’a delusione,
o quanno soffia o vient’e ll’amarezza,
quanno ‘nfuria a bufera d’a passione
o nira scinne a nebbia d’a tristezza,

discret’e muto o mestiere suio o ssape…
tu vai tranquillo e nun te spaventa’,
pecchè st’ombrello ca t’aggio miso ‘ncapa
assorb’o mmale e nun t’ho ffa arriva’!

Stamme a senti’, criatura mia amirosa,
e sti parole mie nun t’e scurda’
pecchè stasera te voglio di’ ‘na cosa
che comm’a nu testamento adda resta’…

Pure si e spalle mie s’incurvarranno,
piegate sott’ o ppeso dell’età,
e pure si e rughe a pelle copriranno,
st’ombrello e carne non invecchiarrà

A carne invecchia e poi nu juorno more…
Nun chiagnere quanno stu juorno arrivarrà
pecchè ‘mpiett’ a ogni mamma c’è nu core
ca ten’o dono dell’immortalità!

C’a stessa forz’e mò, criatura bella,
o toio cammino pe’ sempe seguirà
e pure quanno poi sarrà ‘na stella
da dint’o cielo ti proteggerà!